ବେକରେ ବିଜେପି ଉତ୍ତରୀୟ, କାର୍ଯ୍ୟରେ ପୋଲିସ: ବାଲିଛାଇ ଫାଣ୍ଡି ଅଧିକାରୀଙ୍କ ଭାଇରାଲ୍ ଫଟୋକୁ ନେଇ ଚର୍ଚ୍ଚା…

ପୋଲିସ ବର୍ତ୍ତମାନ ବିଜେପି ର ଦଳୀୟ କର୍ମୀ…!

ବ୍ରହ୍ମପୁର: ପୋଲିସର ନିରପେକ୍ଷତାକୁ ନେଇ ସବୁବେଳେ ପ୍ରଶ୍ନ ଉଠୁଥିବା ବେଳେ ଏବେ ଗଞ୍ଜାମ ଜିଲ୍ଲାରୁ ଏକ ଚୋକାଉଲା ଭଳି ଚିତ୍ର ସାମ୍ନାକୁ ଆସିଛି। ଜଣେ ବର୍ଦ୍ଦିଧାରୀ ପୋଲିସ ଅଧିକାରୀ ଦଳୀୟ କାର୍ଯ୍ୟକ୍ରମରେ ବେକରେ ଶାସକ ଦଳର ଉତ୍ତରୀୟ ପକାଇଥିବା ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।

ସୂଚନା ଅନୁଯାୟୀ, ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅନ୍ତର୍ଗତ ବାଲିଛାଇ ଫାଣ୍ଡି ଅଧିକାରୀ ଏକ ବିଜେପି ଦଳୀୟ କାର୍ଯ୍ୟକ୍ରମରେ ସାମିଲ ହୋଇଥିଲେ। ତେବେ ଡ୍ୟୁଟି ସମୟରେ ସେ ନିଜ ବେକରେ ବିଜେପିର ଦଳୀୟ ଉତ୍ତରୀୟ ପକାଇ ଲୋକଙ୍କ ଗହଣରେ ଥିବା ଦେଖିବାକୁ ମିଳିଛି। ରାଜ୍ୟରେ ‘ଡବଲ ଇଞ୍ଜିନ’ ସରକାର ଆସିବା ପରେ ପ୍ରଶାସନିକ କଳ ଓ ପୋଲିସ ବିଭାଗର କିଛି ଅଧିକାରୀ ଶାସକ ଦଳର ନେତାଙ୍କୁ ସନ୍ତୁଷ୍ଟ କରିବା ପାଇଁ ଏଭଳି କାର୍ଯ୍ୟ କରୁଥିବା ଚର୍ଚ୍ଚା ଜୋର ଧରିଛି।

ଜଣେ ସରକାରୀ କର୍ମଚାରୀ, ବିଶେଷ କରି ପୋଲିସ ବିଭାଗର ଅଧିକାରୀ କୌଣସି ନିର୍ଦ୍ଦିଷ୍ଟ ରାଜନୈତିକ ଦଳର ଚିହ୍ନ ବା ଉତ୍ତରୀୟ ବ୍ୟବହାର କରିବା ପୋଲିସ ମାନୁଆଲ୍ ଏବଂ ଆଚରଣ ବିଧିର ଉଲ୍ଲଂଘନ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି। ଫାଣ୍ଡି ଅଧିକାରୀଙ୍କ ଏଭଳି ‘ବୋଲକରା’ ସଦୃଶ କାର୍ଯ୍ୟକଳାପକୁ ବିଭିନ୍ନ ସ୍ତରରେ ନିନ୍ଦା କରାଯାଇଛି।

ପୋଲିସ ବର୍ଦ୍ଦିର ମର୍ଯ୍ୟାଦା ଉଲ୍ଲଂଘନ କରିଥିବା ଏହି ଅଧିକାରୀଙ୍କ ବିରୋଧରେ ରାଜ୍ୟ ସରକାର ଓ ପୋଲିସ ବିଭାଗର ଉଚ୍ଚପଦସ୍ଥ ଅଧିକାରୀ କି କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି, ତାହା ଏବେ ସାଧାରଣରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।