ନିସର୍ତ ନ୍ୟୁଜର ମହା ପ୍ରଭାବ : ଖବର ପ୍ରସାରଣ ପରେ ମିଳିଲା କାର୍ଯ୍ୟାଦେଶ, ଆବାସ ପାଇ ଖୁସି ମାନସିଂଙ୍କ ପରିବାର

ଉମରକୋଟ : ଗଣମାଧ୍ୟମରେ ପ୍ରସାରିତ ଏକ ଖବର କିପରି ଜଣେ ଅସହାୟ ପରିବାର ପାଇଁ ଆଶାର ଆଲୋକ ସାଜିପାରେ, ତାହାର ଏକ ଉଦାହରଣ ଉମରକୋଟ ବ୍ଲକରୁ ସାମ୍ନାକୁ ଆସିଛି। ନିସର୍ତ ନ୍ୟୁଜରେ ପ୍ରସାରିତ ଏକ ଖବର ପରେ ପ୍ରଶାସନ ତତ୍ପରତା ଦେଖାଇ ଅଗ୍ନିକାଣ୍ଡରେ ସର୍ବସ୍ୱ ହରାଇଥିବା ପରିବାର ପାଇଁ ଆବାସ ଯୋଜନାରେ କାର୍ଯ୍ୟାଦେଶ ପ୍ରଦାନ କରିଥିବା ଜଣାପଡ଼ିଛି।
ସୂଚନା ଅନୁଯାୟୀ, ଗତ ମାସର ୩ ତାରିଖରେ ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ଅନ୍ତର୍ଗତ ସୁନାବେଡା ପଞ୍ଚାୟତ ସଦର ଅଞ୍ଚଳରେ ଏକ ଦୁଃଖଦ ଅଗ୍ନିକାଣ୍ଡ ଘଟିଥିଲା। ଗ୍ରାମର ମାନସିଂ ହରିଜନଙ୍କ ଘରେ ଚୁଲିର ନିଆଁ ବ୍ୟାପିଯିବାରୁ ସମ୍ପୂର୍ଣ୍ଣ ଘରଟି ପୋଡ଼ି ଯାଇଥିଲା। ଏହି ଅଗ୍ନିକାଣ୍ଡରେ ଘରର ସମସ୍ତ ଆସବାବପତ୍ର, ଦୈନନ୍ଦିନ ବ୍ୟବହାର ସାମଗ୍ରୀ ଓ ଆବଶ୍ୟକୀୟ ଜିନିଷପତ୍ର ପୋଡ଼ି ପାଉଁଶ ହୋଇଯାଇଥିଲା। ଫଳରେ ପରିବାରଟି ହଠାତ୍ ଅସହାୟ ଓ ନିରାଶ୍ରୟ ଅବସ୍ଥାରେ ପହଞ୍ଚିଯାଇଥିଲା।
ଘଟଣା ପରେ ଏହି ସମ୍ବାଦ ନିସର୍ତ ନ୍ୟୁଜରେ ପ୍ରସାରିତ ହେବା ସହିତ ପ୍ରଶାସନିକ ମହଳରେ ଚଞ୍ଚଳତା ସୃଷ୍ଟି ହୋଇଥିଲା। ପରେ ସମ୍ପୃକ୍ତ ପ୍ରଶାସନିକ ଅଧିକାରୀମାନେ ପ୍ରଭାବିତ ପରିବାର ନିକଟରେ ପହଞ୍ଚି ଘଟଣାର ତଦନ୍ତ କରିଥିଲେ। ଏହା ସହିତ ପରିବାରକୁ ଆବଶ୍ୟକ ସହଯୋଗ ଓ ଆଶ୍ୱାସନା ମଧ୍ୟ ପ୍ରଦାନ କରାଯାଇଥିଲା।
ଏବେ ୨୦୨୬-୨୭ ବର୍ଷ ପାଇଁ ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାର ହିତାଧିକାରୀ ତାଲିକା ପ୍ରକାଶ ପାଇଥିବା ବେଳେ ମାନସିଂ ହରିଜନଙ୍କ ପରିବାରକୁ ମଧ୍ୟ ଅନ୍ତର୍ଦୟ ଗୃହ ଯୋଜନା ଅଧୀନରେ ସାମିଲ କରାଯାଇଛି। ଆଜି ପ୍ରଶାସନ ପକ୍ଷରୁ ପରିବାରକୁ ଆନୁଷ୍ଠାନିକ ଭାବେ କାର୍ଯ୍ୟାଦେଶ ପ୍ରଦାନ କରାଯାଇଥିବା ସୂଚନା ମିଳିଛି।
ଘର ପାଇବା ଖବର ପରେ ମାନସିଂଙ୍କ ପରିବାର ମଧ୍ୟରେ ଖୁସିର ଲହରୀ ଖେଳିଯାଇଛି। ପରିବାର ସଦସ୍ୟମାନେ ଏହି ସହାୟତା ପାଇଁ ପ୍ରଶାସନ ପ୍ରତି କୃତଜ୍ଞତା ଜଣାଇବା ସହ ନିଜ ସମସ୍ୟାକୁ ସମାଜ ସାମ୍ନାକୁ ଆଣିଥିବା ନିସର୍ତ ନ୍ୟୁଜ ପ୍ରତିନିଧିଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି। ସ୍ଥାନୀୟ ଅଞ୍ଚଳରେ ଏହି ଘଟଣାକୁ ଗଣମାଧ୍ୟମର ସକାରାତ୍ମକ ଭୂମିକାର ଏକ ଉଦାହରଣ ଭାବେ ଦେଖାଯାଉଛି।